मानसपूजा
नमो स्वामिराजं दत्तावतारम् । श्रीविष्णु ब्रह्मा शिवशक्तिरुपम् ।
ब्रह्मस्वरुपाय करुणाकराय । स्वामी समर्थाय नमो नमस्ते ॥१॥
हे स्वामि दत्तात्रया हे कृपाळा । मला ध्यानमूर्ती दिसू देई डोळा ।
कुठे मया माझी म्हणे बाळ जैसा । समर्था तुम्हावीण हो जीव तैसा ॥२॥
स्वामी समर्था तुम्ही स्मर्तृगामी । हृदयासनी या बसा प्रार्थितो मी ।
पुजेचे यथासांग साहित्य केले । मखरांत स्वामी गुरु बैसविले ॥३॥
महाशक्ती येथे उभ्या ठाकताती । जिथे सर्व सिद्धी पदी लोळताती ।
असे सर्व सामर्थ्य तो हा समर्थ । परब्रह्म साक्षात् गुरुदेव दत्त ||४||
सुवर्ण ताटी महारत्न ज्योती । ओवाळुनी अक्षता लावू मोती ।
शुभारंभ ऐसा करुन पुजेला । चरणांवरी ठेवू या मस्तकाला ॥५॥
हा अर्ध्य अभिषेक स्वीकारी माझा । तुझी पाद्यपूजा करी बाळ तूझा ।
प्रणिपात साष्टांग शरणांगताचा । तुम्हा वाहिला भार या जीवनाचा ॥६॥
ही ब्रह्मपूजा महाविष्णुपूजा । शिवशंकराची असे शक्तिपुजा ।
दही दूध शुद्धोदकाने तायाला । पंचामृत स्नान घालू प्रभूला ॥७॥
वीणा तुताऱ्या किती वाजताती । शंखादि वाद्ये पहा गर्जताती ।
म्हणती नगारे गुरुदेव दत्त | श्री दत्त जय दत्त स्वामी समर्थ ॥८ ॥
प्रत्यक्ष गंगा जलकुंभी आली । श्री दत्त स्वामिंसी या स्नान घाली ।
महासिद्ध आले पदतीर्थ घ्याया । महिमा तयांचा कळेना जगा या ॥ ९ ॥
मी धन्य झालो हे तीर्थ घेता । घडू दे पुजा ही यथासांग आता ।
आजानुबाहू दिव्य कांती सतेज । नसे मानवी देह हा स्वामीराज ॥१०॥
प्रत्यक्ष श्रीसद्गुरु दत्तराज । तया घालुया रेशमी वस्त्रसाज ।
सुगंधीत भाळी टिळा रेखियला । शिरी हा जरी-टोप शोभे तयाला ।। ११।।
वक्षःस्थळी लाविल्या चंदनाचा । सुवास तो वाढवी भाव साचा ।
शिरी वाहुया बिल्व तुलसी दलाते । गुलाब जाई-जुई अत्तराते || १२ ||
गंधाक्षता वाहुनिया पदांला । ही अर्पूया जीवन पुष्पमाला ।
चरणी करांनी मिठी मारु देई । म्हणे लेकरासी सांभाळ आई ||१३||
इथे लावुया केशर कस्तुरीचा । सुगंधात हा धूप नाना प्रतीचा ।
पुष्पांजली ही तुम्हां अर्पियेली | गगनांतुनी पुष्पवृष्टी जहाली || १४ ||
करुणावतारी अवधूत किर्ती । दयेची कृपेचीच ही शुद्ध मूर्ती ।
प्रभा फाकली शक्तिच्या मंडलांची । अशी दिव्यता स्वामी योगेश्वरांची ।। १५ ।
हृन्मंदिरीची ही स्नेहज्योती । मला दाखवी सामिची योगमूर्ती ।
करु आरती आर्त भावे प्रभूंची । गुरुदेव श्रीस्वामी दत्तात्रयांची ।। १६ ।।
पंचारती ही असे पंचप्राण | ओवाळुनी ठेवू चरणांवरुन ।
निघेना पुढे शब्द बोलू मी तोही । मनीचे तुम्ही जाणता सर्व काही ॥१७॥
हे स्वामीराजा बसा भोजनाला । हा पंचपक्वान्न नैवेद्य केला ।
पुरणाची पोळी तुहा आवडीची । लाडू करंजी असे ही खव्याची ॥ १८ ॥
डीळींब द्राक्षे फळे आणि मेवा । हे केशरी दूध घ्या स्वामीदेवा ।
पुढे हात केला या लेकराने । प्रसाद द्यावा अपुल्या कराने ।। १९ ।।
तांबूल घ्यावा स्वामी समर्था । चरणाची सेवा करु द्यावी आता ।
प्रसन्नेतून मागी मी काय । हृदयी ठेव माते तुझे दोन्ही पाय || २० ||
सर्वस्व हा जीव चरणी ठेवू । दुजी दक्षिणा मी तुम्हा काय देऊ ।
नको दूर लोटू अपुल्या मुलासी । कृपा छत्र तुमचेच या बालकासी ।। २१ ।।
धरु दे आता घट्ट तुझ्या पदाला । पदी ठेवू दे शीर शरणांगताला ।
हृदयी भाव यावे असे तळमळीचे । करी पूर्ण कल्याण जे या जिवांचे ॥ २२ ॥
तुझे बाळ पाही तुझी वाट देवा । नका वेळ लावू कृपाहस्त ठेवा ।
मनी पूजनाची असे दिव्य ठेव । वसो माझिया अंतरी स्वामी देव || २३ ||
॥ श्री गुरुदेव दत्त । । श्रीस्वामी समर्थ महाराज की जय ॥
कोणत्याही टिप्पण्या नाहीत: